சாதாரண தரப் பரீட்சை பெறுபேறுகள் வெளியாகும் திகதி: பரீட்சை திணைக்களத்தின் முக்கிய அறிவிப்பு

இந்த வருடத்திற்கான கல்விப் பொதுத் தராதர சாதாரண தரப் பரீட்சை பெறுபேறுகள் இன்னும் சில தினங்களில் வெளியாகும் என எதிர்பார்ப்பதாக பரீட்சைகள் திணைக்களம் அறிவித்துள்ளது.

இது தொடர்பில், பரீட்சைகள் திணைக்கள ஆணையாளர் அமித் ஜயசுந்தர கூறுகையில், 2023ஆம் ஆண்டுக்கான சாதாரண தரப் பரீட்சை பெறுபேறுகளுக்கான ஆவணங்களைத் தயாரிக்கும் பணிகள் தற்போது இறுதிக் கட்டத்தை எட்டியுள்ளது.

கடந்த உயர்தரப் பரீட்சையின் திருத்தப்பட்ட பெறுபேறுகள் இந்த வாரம் வெளியிடப்படும் எனவும் அவர் குறிப்பிட்டுள்ளார். இதேவேளை கல்விப் பொதுத் தராதர சாதாரண தரப் பரீட்சை பெறுபேறுகள் இன்னும் சில தினங்களில் வெளியிடப்படும் என கல்வி அமைச்சர் சுசில் பிரேம்ஜயந்த நேற்று நடைபெற்ற நாடாளுமன்ற அமர்வில் தெரிவித்திருந்தார்.

அதேவேளை கல்விப் பொதுத் தராதர உயர்தரப் பரீட்சையை நடாத்துவதற்கான அனைத்து ஏற்பாடுகளும் செய்யப்பட்டுள்ளதாகவும் அவர் சுட்டிக்காட்டினார்.